Carissimo Roberto,

grassie per 'sto messagio, che me ga fato tanto piasser.

 

'Na volta al mese 'vemo el coragio de mandarghe el calendario dele nostre ativita' anca a duti i amissi che 'vemo nela lista: no solo in Italia, ma anca in Canada, in Australia, in Argentina,..., no perche' che i vegni a véderne, ma solo perché che i sapi quel che fassemo, come che se sbisighemio a casa nostra, in quela Istria che xe stada veneta per oltra sinquesento ani. Noi qua semo restai in pochi, ma fassemo de duto per no perder le nostre origini venete: mantignir viva la parlada (veneta e italiana), le nostre tradissioni, la storia, la cultura, e duto quel che gavemo eredità de la nostra gente de origine veneta.

 

Go visto che nel vostro sito xe ancora la icona dela defunta Piazzamercato. Anca noi ghe 'vemo fato parte fina al 2010, quando che gavemo dovu' sercar un novo logo per notar le nostre robe. E ne ga dispiasso tanto.

 

Ciao, e un strucon anca de parte mia.

 

Amina Dudine (Comunità degli Italiani "Dante Alighieri" – Isola d'Istria)

 

www.danteisola.org